in einer wirtshausstube: zwei männer bei einem bier. hintergrundmusik

eins: aber heut geat der föhn.
zwei: hoffentlich.
eins: was hoffentlich?
zwei: ja, hoffentlich, geat er bold.
eins: a so moansch des!
zwei: gmeldet habensr, dass er heut zsommenbrochen soll.
eins: hoffentlich, die leut san eh olle schu damisch von dem föhn.
zwei: er mocht ja alle deppat.
eins: bei dem föhn muasch ja deppat wern. da kunnsch di kaum no auf die strossn traun, weil angscht haben muasch, dass di uaner übern haufen fahrt.
zwei: oder dass di a baam derschlogt.
eins: geschtern bin i auf an begräbnis gwesen, da hot der föhn blosn, a katastrophe.
zwei: wen hats denn derwischt?
eins: an alten arbeitskolleg. i glab nit, dass du ihn kennt hosch.
zwei: was hat gfahlt?
eins: sekundentod. bumms und hin.
zwei: das hört ma olm öfter.
eins: bei dem wetter isches kua wunder.
zwei: wia olt wor er denn?
eins: 59.
zwei: 59?
eins: jo.
zwei: wia gibs denn des? des isch jo kua olter nit.
eins: am obend isch er huam, hot si no a greaschtl gmocht – er wor ja alluan und gschieden – hockt sie nieder, fallt vom stuahl, patsch. hin.
zwei: sou schnell geats.
eins: nit amoul is greaschtl worn nou vergönnt.
zwei: so isches im leben.
eins: dabei hot er nix gsoffn, nix gracht und a nit ghurt, gor nix.
zwei: des hat heut nix mehr zum sagen. wenns aus isch, isches aus.
eins: genau.
zwei: aber sou an toad kunn ma si lei winschen.
eins: leiden hat er nit miassn.
zwei: i hoff, i kugel a amoul sou vun stuahl.
eins: aber dann, bitte nocha nouchn essen, dass i zumindescht mei greaschtl nou ghob hun, nit sou wia der toni, der hat ja nit amoul des ghabt und sinsch a nix, lei sporn und sporn.
zwei: und fir wos?
eins: genau, fir wos?
zwei: die erben wern sie frein.
eins: wous glabsch, weil der toni hot an pfeffer.
zwei: ghabt.
eins: ja ghabt.
zwei: hot er kinder?
eins: a madl, aber dei tuat a nit sou recht.
zwei: nocha kunn se si frein.
eins: dei hot sie jo schu am friedhof gfreit, gestern beim begräbnis. kua zoacher isch ihr auskemmen.
zwei: so sein se die erben. groud schnell schnell in die gruam und nocha nix wie hin zun notar und auf die bank.
eins: ja. genau. es wor schu traurig aufn friedhof geschtern
zwei: a begräbnis isch olm a traurige angelegenheit.
eins: ja. fost kuane leit und der föhn hot blousn, dass es in die weiber die hiat davontrogn hot.
zwei: der scheißföhn, iatz werds zeit, dass er zsomnmenbricht, bevor nou alle deppat wern.